(ភ្នំពេញ) ទីចាត់ការការពារគីមីសាស្ត្រ អគ្គបញ្ជាការដ្ឋាន បានចេញសេចក្តីប្រកាសព័ត៌មានរកឃើញករណីឧត្តមសេនីយ៍ ១រូបនិងភរិយាមានវិជ្ជមានកូវីដ-១៩ បើទោះបីជាធ្លាប់បានចាក់វ៉ាក់សាំងចំនួន ០២លើករួចមកហើយ។

សេចក្តីប្រកាសព័ត៌មានរបស់ទីចាត់ការការពារគីមីសាស្ត្រ អគ្គបញ្ជាការដ្ឋាន នៅថ្ងៃទី២២ ខែមេសា ឆ្នាំ២០២១នេះបានបញ្ជាក់ទៀតថាលោកឧត្តមសេនីយ៍ទោ កែវ ប៊ុនណា អត្តលេខ ០១២៥៧៥ នាយករងទីចាត់ការការពារគីមីសាស្ត្រ គាត់បានទៅយកសំណាកកាលពីថ្ងៃទី២១ ខែមេសា ឆ្នាំ២០២១ ត្រូវបានរកឃើញវិជ្ជមានកូវីដ-១៩ កំរិតស្រាល ឯភរិយាក៏រកឃើញវិជ្ជមានដូចគ្នា។ បច្ចុប្បន្នកំពុងសម្រាកព្យាបាលនៅផ្ទះ ដែលស្ថិតនៅភូមិហនុមាន ឃុំក្រាំងធ្នង់ ស្រុកបាទី ខេត្តតាកែវ តាមការណែនាំរបស់ក្រុមគ្រូពេទ្យក្រសួងសុខាភិបាល។

ទីចាត់ការការពារគីមីសាស្ត្រ បានប្រកាសដល់នាយទាហាន នាយទាហានរង និងពលទាហានដែលបានពាក់ព័ន្ធដោយផ្ទាល់ ឬដោយប្រយោល ត្រូវអនុវត្តន៍តាមវិធានការការពារកូវីដ-១៩ របស់ ក្រសួងសុខាភិបាល អោយបានខ្ជាប់ខ្ជួន និងម៉ឺងម៉ាត់បំផុត៕